Subscribe to our newsletter and get our newest updates

Abbas Tabish

  • Ghazal


koi milta nahin ye bojh uThane ke liye


koī miltā nahīñ ye bojh uThāne ke liye
shaam bechain hai sūraj ko girāne ke liye

apne ham-zād daraḳhtoñ meñ khaḌā sochtā huuñ
maiñ to aayā thā inheñ aag lagāne ke liye

maiñ ne to jism kī dīvār hī Dhaa.ī hai faqat
qabr tak khodte haiñ log ḳhazāne ke liye

do palak biich kabhī raah na paa.ī varna
maiñ ne koshish to bahut kī nazar aane ke liye

lafz to lafz yahāñ dhuup nikal aatī hai
terī āvāz kī bārish meñ nahāne ke liye

kis tarah tark-e-ta.alluq kā maiñ sochūñ 'tābish'
haath ko kāTnā paḌtā hai chhuḌāne ke liye

koi milta nahin ye bojh uThane ke liye
sham bechain hai suraj ko girane ke liye

apne ham-zad daraKHton mein khaDa sochta hun
main to aaya tha inhen aag lagane ke liye

main ne to jism ki diwar hi Dhai hai faqat
qabr tak khodte hain log KHazane ke liye

do palak bich kabhi rah na pai warna
main ne koshish to bahut ki nazar aane ke liye

lafz to lafz yahan dhup nikal aati hai
teri aawaz ki barish mein nahane ke liye

kis tarah tark-e-talluq ka main sochun 'tabish'
hath ko kaTna paDta hai chhuDane ke liye


Leave a comment

+