Subscribe to our newsletter and get our newest updates

Abbas Tabish

  • Ghazal


pani aankh mein bhar kar laya ja sakta hai


paanī aañkh meñ bhar kar laayā jā saktā hai
ab bhī jaltā shahr bachāyā jā saktā hai

ek mohabbat aur vo bhī nākām mohabbat
lekin is se kaam chalāyā jā saktā hai

dil par paanī piine aatī haiñ ummīdeñ
is chashme meñ zahr milāyā jā saktā hai

mujh gumnām se pūchhte haiñ farhād o majnūñ
ishq meñ kitnā naam kamāyā jā saktā hai

ye mahtāb ye raat kī peshānī kā ghaav
aisā zaḳhm to dil par khāyā jā saktā hai

phaTā-purānā ḳhvāb hai merā phir bhī 'tābish'
is meñ apnā-āp chhupāyā jā saktā hai

pani aankh mein bhar kar laya ja sakta hai
ab bhi jalta shahr bachaya ja sakta hai

ek mohabbat aur wo bhi nakaam mohabbat
lekin is se kaam chalaya ja sakta hai

dil par pani pine aati hain ummiden
is chashme mein zahr milaya ja sakta hai

mujh gumnam se puchhte hain farhad o majnun
ishq mein kitna nam kamaya ja sakta hai

ye mahtab ye raat ki peshani ka ghaw
aisa zaKHm to dil par khaya ja sakta hai

phaTa-purana KHwab hai mera phir bhi 'tabish'
is mein apna-ap chhupaya ja sakta hai

Videos
This video is playing from YouTube Videos
This video is playing from YouTube Abbas Tabish Abbas Tabish

Source: Book : Ishq Abaad (kulliyat) (Pg. 351)

Leave a comment

+