dekhtā kuchh huuñ dhyān meñ kuchh hai
hai yaqīñ kuchh gumān meñ kuchh hai

sanam apne ko ham ḳhudā jo kaheñ
kab qusūr us kī shaan meñ kuchh hai

kuchh na dekhā kisī makān meñ ham
kahte haiñ lā-makān meñ kuchh hai

tishna-e-ḳhūñ haiñ la.al-e-lab tere
surḳhī-e-rañg-e-pān meñ kuchh hai

tere dīdār kī havas ke sivā
dekh to merī jaan meñ kuchh hai

tū jo talvār khīñche hai mujh par
zaḳhm bhī darmiyān meñ kuchh hai

dekh to ab jafā-kashī kī taab
mujh dil-e-nā-tavān meñ kuchh hai

dekh kar mujh ko naza.a meñ tū ne
na kahā is javān meñ kuchh hai

ham ko paTkā zamīn ke uupar
gardish-e-āsmān meñ kuchh hai

fā.eda tujh ko ai za-ḳhud ġhāfil
fikr-e-sūd-o-ziyān meñ kuchh hai

ye zamāna 'muhib' ba-qaul 'dard'
aan meñ kuchh hai aan meñ kuchh hai

dekhta kuchh hun dhyan mein kuchh hai
hai yaqin kuchh guman mein kuchh hai

sanam apne ko hum KHuda jo kahen
kab qusur us ki shan mein kuchh hai

kuchh na dekha kisi makan mein hum
kahte hain la-makan mein kuchh hai

tishna-e-KHun hain lal-e-lab tere
surKHi-e-rang-e-pan mein kuchh hai

tere didar ki hawas ke siwa
dekh to meri jaan mein kuchh hai

tu jo talwar khinche hai mujh par
zaKHm bhi darmiyan mein kuchh hai

dekh to ab jafa-kashi ki tab
mujh dil-e-na-tawan mein kuchh hai

dekh kar mujh ko naza mein tu ne
na kaha is jawan mein kuchh hai

hum ko paTka zamin ke upar
gardish-e-asman mein kuchh hai

faeda tujh ko ai za-KHud ghafil
fikr-e-sud-o-ziyan mein kuchh hai

ye zamana 'muhib' ba-qaul 'dard'
aan mein kuchh hai aan mein kuchh hai

Source: Deewan-e-Waleeullah Muhib