Subscribe to our newsletter and get our newest updates

Abbas Ali Khan Bekhud

  • Ghazal


main ashk-e-KHunin baha raha hun


maiñ ashk-e-ḳhūnīñ bahā rahā huuñ
fasāna rañgīñ banā rahā huuñ

nuqūsh-e-armāñ banā rahā huuñ
banā rahā huuñ miTā rahā huuñ

nahīñ koī rāhbar to kyā ġham
kisī taraf ko to jā rahā huuñ

junūñ kī sarhad meñ aa gayā huuñ
ḳhirad ko rasta batā rahā huuñ

balā hai ye shauq-e-rah-navardī
ki aage manzil se jā rahā huuñ

alag huā ḳhizr se ye kah kar
maiñ apnī manzil pe jā rahā huuñ

zamāna badlā hai be-navā huuñ
kabhī tirā ham-navā rahā huuñ

ye nā-tavānī meñ bhī hai dam-ḳham
ki bojh ġham ke uThā rahā huuñ

vo mashq apnī baḌhā rahe haiñ
maiñ dil nishāne pe lā rahā huuñ

nahīñ fasāne kā koī maqsad
vo sun rahe haiñ sunā rahā huuñ

nahīñ vo banñe ke apne 'beḳhud'
maiñ ḳhud ko un kā banā rahā huuñ

main ashk-e-KHunin baha raha hun
fasana rangin bana raha hun

nuqush-e-arman bana raha hun
bana raha hun miTa raha hun

nahin koi rahbar to kya gham
kisi taraf ko to ja raha hun

junun ki sarhad mein aa gaya hun
KHirad ko rasta bata raha hun

bala hai ye shauq-e-rah-nawardi
ki aage manzil se ja raha hun

alag hua KHizr se ye kah kar
main apni manzil pe ja raha hun

zamana badla hai be-nawa hun
kabhi tera ham-nawa raha hun

ye na-tawani mein bhi hai dam-KHam
ki bojh gham ke uTha raha hun

wo mashq apni baDha rahe hain
main dil nishane pe la raha hun

nahin fasane ka koi maqsad
wo sun rahe hain suna raha hun

nahin wo banne ke apne 'beKHud'
main KHud ko un ka bana raha hun


Leave a comment

+