Subscribe to our newsletter and get our newest updates

Abbas Ali Khan Bekhud

  • Ghazal


hijr ki shab zulf-e-barham ka KHayal aata raha


hijr kī shab zulf-e-barham kā ḳhayāl aatā rahā
ik na ik har din mire sar par vabāl aatā rahā

shukr hai tārīk dil meñ raushnī ke vāste
go tasavvur meñ sahī us kā jamāl aatā rahā

hai karam us kā ki ham se be-basar ke vāste
ālam-e-amsāl meñ vo be-misāl aatā rahā

bhūlne vaale ko āḳhir dil bhulā.e kis tarah
be-ḳhayālī meñ bhī jab us kā ḳhayāl aatā rahā

maiñ ne apnī ḳhastagī kī daad paa.ī is tarah
mere arz-e-hāl par un ko jalāl aatā rahā

bas yahī kyā kam hai merī sāf-goī kī dalīl
un ke dil meñ merī jānib se malāl aatā rahā

kyā bigaḌ jaatā jo ho jaatī tavajjoh kī nazar
muddatoñ dar par gadā-e-be-savāl aatā rahā

mujh ko 'beḳhud' jab kabhī aayā hai tauba kā ḳhayāl
der tak apne gunāhoñ kā ḳhayāl aatā rahā

hijr ki shab zulf-e-barham ka KHayal aata raha
ek na ek har din mere sar par wabaal aata raha

shukr hai tarik dil mein raushni ke waste
go tasawwur mein sahi us ka jamal aata raha

hai karam us ka ki hum se be-basar ke waste
aalam-e-amsal mein wo be-misal aata raha

bhulne wale ko aaKHir dil bhulae kis tarah
be-KHayali mein bhi jab us ka KHayal aata raha

main ne apni KHastagi ki dad pai is tarah
mere arz-e-haal par un ko jalal aata raha

bas yahi kya kam hai meri saf-goi ki dalil
un ke dil mein meri jaanib se malal aata raha

kya bigaD jata jo ho jati tawajjoh ki nazar
muddaton dar par gada-e-be-sawal aata raha

mujh ko 'beKHud' jab kabhi aaya hai tauba ka KHayal
der tak apne gunahon ka KHayal aata raha


Leave a comment

+