Subscribe to our newsletter and get our newest updates

Aatish Bahawalpuri

  • Ghazal


zindagi guzri meri KHushk shajar ki surat


zindagī guzrī mirī ḳhushk shajar kī sūrat
maiñ ne dekhī na kabhī barg-o-samar kī sūrat

ḳhuub jī bhar ke rulā.eñ jo nazar meñ un kī
qīmtī hoñ mire aañsū bhī guhar kī sūrat

apne chehre se jo zulfoñ ko haTāyā us ne
dekh lī shaam ne tābinda sahar kī sūrat

is na.e daur kī tahzīb se allāh bachā.e
masḳh hotī nazar aatī hai bashar kī sūrat

haram-o-dair se matlab na kalīsā se ġharaz
kaash ye bhī kahīñ hote tire ghar kī sūrat

nek a.amāl bhī auroñ ke nahīñ japte haiñ
aib apne nazar aate haiñ hunar kī sūrat

kyā koī us pe bhī uftād paḌī hai 'ātish'
abr barsā hai mire dīda-e-tar kī sūrat

zindagi guzri meri KHushk shajar ki surat
main ne dekhi na kabhi barg-o-samar ki surat

KHub ji bhar ke rulaen jo nazar mein un ki
qimti hon mere aansu bhi guhar ki surat

apne chehre se jo zulfon ko haTaya us ne
dekh li sham ne tabinda sahar ki surat

is nae daur ki tahzib se allah bachae
masKH hoti nazar aati hai bashar ki surat

haram-o-dair se matlab na kalisa se gharaz
kash ye bhi kahin hote tere ghar ki surat

nek aamal bhi auron ke nahin japte hain
aib apne nazar aate hain hunar ki surat

kya koi us pe bhi uftad paDi hai 'atish'
abr barsa hai mere dida-e-tar ki surat


Source: Book : Jada-e-manzil (Pg. 27) Author : Atish Bahawalpuri Publication : Nirali Duniya Publications (2001) Edition : 2001

Leave a comment

+