tirī dostī kā kamāl thā mujhe ḳhauf thā na malāl thā
mirā rom rom thā hairatī mirā dil bhī mahv-e-dhamāl thā

koī shāḳh-e-girya lipaT ga.ī mire sūkhte hue jism se
maiñ ḳhizāñ kī rut meñ harā huā ye ''darūd'' hī meñ kamāl thā

abhī reg-e-dasht pe sabt haiñ sabhī naqsh mere sujūd ke
vo jo ma.arke kā sabab huā vahī harf-e-haq mirī Dhaal thā

mirī raakh meñ thiiñ kahīñ kahīñ mere ek ḳhvāb kī kirchiyāñ
mere jism-o-jāñ meñ chhupā huā tirī qurbatoñ kā ḳhayāl thā

inhī hairatoñ meñ basar huī na ḳhabar huī ki sahar huī
ye tamām arsa-e-zindagī ki muhīt-e-shām-e-visāl thā

teri dosti ka kamal tha mujhe KHauf tha na malal tha
mera rom rom tha hairati mera dil bhi mahw-e-dhamal tha

koi shaKH-e-girya lipaT gai mere sukhte hue jism se
main KHizan ki rut mein hara hua ye darud hi mein kamal tha

abhi reg-e-dasht pe sabt hain sabhi naqsh mere sujud ke
wo jo marke ka sabab hua wahi harf-e-haq meri Dhaal tha

meri rakh mein thin kahin kahin mere ek KHwab ki kirchiyan
mere jism-o-jaan mein chhupa hua teri qurbaton ka KHayal tha

inhi hairaton mein basar hui na KHabar hui ki sahar hui
ye tamam arsa-e-zindagi ki muhit-e-sham-e-visal tha