tumheñ gilā hī sahī ham tamāsha karte haiñ
magar ye log bhī kyā kam tamāsha karte haiñ

dikhā.ī dete nahīñ avvalan mire darvesh
kahīñ mileñ to ba-raqsam tamāsha karte haiñ

ye ḳhaas bhiiḌ hai marhūm bādshāhoñ kī
yahāñ sikandar-e-āzam tamāsha karte haiñ

sharīk-e-kār-e-ibādat nahīñ rahe ki ye log
darūn-e-majlis-e-mātam tamāsha karte haiñ

bas ek paañv thiraktā hai rāt-din mujh meñ
chahār-sū ka.ī aalam tamāsha karte haiñ

khulā hai aaj bhī us ḳhānqāh-e-ishq kā dar
malañg aaj bhī paiham tamāsha karte haiñ

tuyūr dekhne aate haiñ merī ek jhalak
hazār bargad-o-shīsham tamāsha karte haiñ

ye shahr majma-e-ḳhālī se gar nahīñ hai ḳhush
to aao mil ke azīzam tamāsha karte haiñ

kuchh aise log haiñ mere bhī milne vaale log
jo bar-janāza-o-chihlum tamāsha karte haiñ

tumhein gila hi sahi hum tamasha karte hain
magar ye log bhi kya kam tamasha karte hain

dikhai dete nahin awwalan mere darwesh
kahin milen to ba-raqsam tamasha karte hain

ye KHas bhiD hai marhum baadshahon ki
yahan sikandar-e-azam tamasha karte hain

sharik-e-kar-e-ibaadat nahin rahe ki ye log
darun-e-majlis-e-matam tamasha karte hain

bas ek panw thirakta hai raat-din mujh mein
chahaar-su kai aalam tamasha karte hain

khula hai aaj bhi us KHanqah-e-ishq ka dar
malang aaj bhi paiham tamasha karte hain

tuyur dekhne aate hain meri ek jhalak
hazar bargad-o-shisham tamasha karte hain

ye shahr majma-e-KHali se gar nahin hai KHush
to aao mil ke azizam tamasha karte hain

kuchh aise log hain mere bhi milne wale log
jo bar-janaza-o-chihlum tamasha karte hain