koī ġhul huā thā na shor-e-ḳhizāñ
ujaḌne lagīñ ḳhud-ba-ḳhud bastiyāñ

jise dekhne ghar se nikle the ham
dhuāñ ho gayā shaam kā vo samāñ

sabhī kuchh to dariyā bahā le gayā
tujhe aur kyā chāhiye āsmāñ

bas ik dhund hai aur kuchh bhī nahīñ
ravāna huī thiiñ jidhar kashtiyāñ

abhī tai-shuda koī jaada nahīñ
abhī tak bhaTakte haiñ sab kārvāñ

yahī ik ḳhabar garm thī shahr meñ
ki ik shoḳh bachche ne khīñchī kamāñ

tamāshā dikhā ke ga.ī sub.h-e-nau
ḳhamoshī hai phir se vahī darmiyāñ

ta.āruf mirā koī mushkil nahīñ
maiñ 'āshufta' chañgezī ibn-e-ḳhizāñ

koi ghul hua tha na shor-e-KHizan
ujaDne lagin KHud-ba-KHud bastiyan

jise dekhne ghar se nikle the hum
dhuan ho gaya sham ka wo saman

sabhi kuchh to dariya baha le gaya
tujhe aur kya chahiye aasman

bas ek dhund hai aur kuchh bhi nahin
rawana hui thin jidhar kashtiyan

abhi tai-shuda koi jada nahin
abhi tak bhaTakte hain sab karwan

yahi ek KHabar garm thi shahr mein
ki ek shoKH bachche ne khinchi kaman

tamasha dikha ke gai subh-e-nau
KHamoshi hai phir se wahi darmiyan

taaruf mera koi mushkil nahin
main 'ashufta' changezi ibn-e-KHizan