duur tak phailā samundar mujh pe sāhil ho gayā
lauT kar jaanā yahāñ se aur mushkil ho gayā

dāḳhila mamnūa likkhā thā fasīl-e-shahr par
paḌh to maiñ ne bhī liyā thā phir bhī dāḳhil ho gayā

ḳhvāb hī bāzār meñ mil jaate haiñ ta.abīr bhī
pahle logoñ se sunā thā aaj qaa.il ho gayā

is hujūm-e-be-karāñ se bhaag kar jaatā kahāñ
tum ne rokā to bahut thā maiñ hī shāmil ho gayā

pahle bhī ye sab manāzir rokte the is dafa
aisā kyā dekhā ki tujh se aur ġhāfil ho gayā

ek mauqa kyā milā ḳhush-fahmiyāñ baḌhne lagīñ
rāsta itnā pasand aayā ki manzil ho gayā

aur kyā detā bhalā sahrā-navardī kā ḳhirāj
tū bachā thā ab ke tū bhī nazr-e-mahmil ho gayā

dur tak phaila samundar mujh pe sahil ho gaya
lauT kar jaana yahan se aur mushkil ho gaya

daKHila mamnua likkha tha fasil-e-shahr par
paDh to main ne bhi liya tha phir bhi daKHil ho gaya

KHwab hi bazar mein mil jate hain tabir bhi
pahle logon se suna tha aaj qail ho gaya

is hujum-e-be-karan se bhag kar jata kahan
tum ne roka to bahut tha main hi shamil ho gaya

pahle bhi ye sab manazir rokte the is dafa
aisa kya dekha ki tujh se aur ghafil ho gaya

ek mauqa kya mila KHush-fahmiyan baDhne lagin
rasta itna pasand aaya ki manzil ho gaya

aur kya deta bhala sahra-nawardi ka KHiraj
tu bacha tha ab ke tu bhi nazr-e-mahmil ho gaya

Source: Rooh-e-Ghazal,Pachas Sala Intekhab