kitne hī peḌ ḳhauf-e-ḳhizāñ se ujaḌ ga.e
kuchh barg-e-sabz vaqt se pahle hī jhaḌ ga.e

kuchh āñdhiyāñ bhī apnī muāvin safar meñ thiiñ
thak kar paḌāv Daalā to ḳheme ukhaḌ ga.e

ab ke mirī shikast meñ un kā bhī haath hai
vo tiir jo kamān ke panje meñ gaḌ ga.e

suljhī thiiñ gutthiyāñ mirī dānist meñ magar
hāsil ye hai ki zaḳhmoñ ke Tāñke ukhaḌ ga.e

nirvān kyā bas ab to amaañ kī talāsh hai
tahzīb phailne lagī jañgal sukaḌ ga.e

is band ghar meñ kaise kahūñ kyā tilism hai
khole the jitne qufl vo hoñToñ pe paḌ ga.e

be-saltanat huī haiñ ka.ī ūñchī gardaneñ
bāhar saroñ ke dast-e-tasallut se dhaḌ ga.e

kitne hi peD KHauf-e-KHizan se ujaD gae
kuchh barg-e-sabz waqt se pahle hi jhaD gae

kuchh aandhiyan bhi apni muawin safar mein thin
thak kar paDaw Dala to KHeme ukhaD gae

ab ke meri shikast mein un ka bhi hath hai
wo tir jo kaman ke panje mein gaD gae

suljhi thin gutthiyan meri danist mein magar
hasil ye hai ki zaKHmon ke Tanke ukhaD gae

nirwan kya bas ab to aman ki talash hai
tahzib phailne lagi jangal sukaD gae

is band ghar mein kaise kahun kya tilism hai
khole the jitne qufl wo honTon pe paD gae

be-saltanat hui hain kai unchi gardanen
bahar saron ke dast-e-tasallut se dhaD gae

Source: Book : Muallim-e-urdu(Lucknow) (Pg. 33) Author : Izhar Ahmad Publication : Published by Izhar ahmad Editor,and publisher at the Shagufta printers Lucknow & Distributed simmam Publication 499/129 Hasanganj lucknow-226020 ( February-1992) Edition :  February-1992