Subscribe to our newsletter and get our newest updates

Aanis Moin

  • Ghazal


ek karb-e-musalsal ki saza den to kise den


ik karb-e-musalsal kī sazā deñ to kise deñ
maqtal meñ haiñ jiine kī duā deñ to kise deñ

patthar haiñ sabhī log kareñ baat to kis se
is shahr-e-ḳhamoshāñ meñ sadā deñ to kise deñ

hai kaun ki jo ḳhud ko hī jaltā huā dekhe
sab haath haiñ kāġhaz ke diyā deñ to kise deñ

sab log savālī haiñ sabhī jism barahna
aur paas hai bas ek ridā deñ to kise deñ

jab haath hī kaT jaa.eñ to thāmegā bhalā kaun
ye soch rahe haiñ ki asā deñ to kise deñ

bāzār meñ ḳhushbū ke ḳharīdār kahāñ haiñ
ye phuul haiñ be-rañg batā deñ to kise deñ

chup rahne kī har shaḳhs qasam khaa.e hue hai
ham zahr bharā jaam bhalā deñ to kise deñ

ek karb-e-musalsal ki saza den to kise den
maqtal mein hain jine ki dua den to kise den

patthar hain sabhi log karen baat to kis se
is shahr-e-KHamoshan mein sada den to kise den

hai kaun ki jo KHud ko hi jalta hua dekhe
sab hath hain kaghaz ke diya den to kise den

sab log sawali hain sabhi jism barahna
aur pas hai bas ek rida den to kise den

jab hath hi kaT jaen to thamega bhala kaun
ye soch rahe hain ki asa den to kise den

bazar mein KHushbu ke KHaridar kahan hain
ye phul hain be-rang bata den to kise den

chup rahne ki har shaKHs qasam khae hue hai
hum zahr bhara jam bhala den to kise den

RECITATIONS Nomaan Shauque



00:00/00:00 ek karb-e-musalsal ki saza den to kise den Nomaan Shauque

Source: Book : Muallim-e-urdu(Lucknow) (Pg. 34) Author : Izhar Ahmad Publication : Published by Izhar ahmad Editor,and publisher at the Shagufta printers Lucknow & Distributed simmam Publication 499/129 Hasanganj lucknow-226020 (February-1992) Edition : February-1992

Leave a comment

+