mat ġhusse ke sho.ale suuñ jalte kuuñ jalātī jā
Tuk mehr ke paanī suuñ tū aag bujhātī jā

tujh chaal kī qīmat suuñ dil niiñ hai mirā vāqif
ai maan bharī chanchal Tuk bhaav batātī jā

is raat añdhārī meñ mat bhuul paḌūñ tujh suuñ
Tuk paañv ke jhāñjhar kī jhankār sunātī jā

mujh dil ke kabūtar kuuñ bāñdhā hai tirī laT ne
ye kaam dharam kā hai Tuk us ko chhuḌātī jā

tujh mukh kī parastish meñ ga.ī umr mirī saarī
ai but kī pujan-hārī Tuk us ko pujātī jā

tujh ishq meñ jal jal kar sab tan kuuñ kiyā kājal
ye raushnī afzā hai añkhiyā ko lagātī jā

tujh neh meñ dil jal jal jogī kī liyā sūrat
yak baar use mohan chhātī suuñ lagātī jā

tujh ghar kī taraf sundar aatā hai 'valī' daa.em
mushtāq daras kā hai Tuk dars dikhātī jā

mat ghusse ke shoale sun jalte kun jalati ja
Tuk mehr ke pani sun tu aag bujhati ja

tujh chaal ki qimat sun dil nin hai mera waqif
ai man bhari chanchal Tuk bhaw batati ja

is raat andhaari mein mat bhul paDun tujh sun
Tuk panw ke jhanjhar ki jhankar sunati ja

mujh dil ke kabutar kun bandha hai teri laT ne
ye kaam dharam ka hai Tuk us ko chhuDati ja

tujh mukh ki parastish mein gai umr meri sari
ai but ki pujan-haari Tuk us ko pujati ja

tujh ishq mein jal jal kar sab tan kun kiya kajal
ye raushni afza hai ankhiya ko lagati ja

tujh neh mein dil jal jal jogi ki liya surat
yak bar use mohan chhati sun lagati ja

tujh ghar ki taraf sundar aata hai 'wali' daem
mushtaq daras ka hai Tuk dars dikhati ja

RECITATIONS Nomaan Shauque



00:00/00:00 mat gusse ke shole suun Nomaan Shauque