husn par bojh hue us ke hī va.ade ab to
tark kar ai ġham-e-dil apne irāde ab to

is qadar aam huī shahr meñ ḳhūñ-pairahnī
nazar aate nahīñ be-dāġh libāde ab to

tū Thahartā nahīñ mere liye phir zid kaisī
qaid is ham-safarī kī bhī uThā de ab to

peḌ ne saa.e ke harfoñ meñ likhā thā jis ko
Dūbte chāñd vo tahrīr miTā de ab to

soḳhta lamhe tujhe bār-e-safar hī hoñge
raakh bhī apne ta.alluq kī uḌā de ab to

ishtihār apnā liye phirtā huuñ qarya qarya
kyā hai qīmat mirī ye koī batā de ab to

ḳhud ko pahuñchā.ī hai kyā kyā na aziyyat maiñ ne
koī 'shāhīn' mujhe is kī sazā de ab to

husn par bojh hue us ke hi wade ab to
tark kar ai gham-e-dil apne irade ab to

is qadar aam hui shahr mein KHun-pairahni
nazar aate nahin be-dagh libaade ab to

tu Thaharta nahin mere liye phir zid kaisi
qaid is ham-safari ki bhi uTha de ab to

peD ne sae ke harfon mein likha tha jis ko
Dubte chand wo tahrir miTa de ab to

soKHta lamhe tujhe bar-e-safar hi honge
rakh bhi apne talluq ki uDa de ab to

ishtihaar apna liye phirta hun qarya qarya
kya hai qimat meri ye koi bata de ab to

KHud ko pahunchai hai kya kya na aziyyat main ne
koi 'shahin' mujhe is ki saza de ab to

Source: Rooh-e-Ghazal,Pachas Sala Intekhab