aap se jhuk ke jo miltā hogā
us kā qad aap se ūñchā hogā

nukta-chīnoñ pe jo hañstā hogā
us ko apne pe bharosā hogā

vo jo vīrān phirā kartā hai
us ke sar meñ koī sahrā hogā

tum na samjhoge mirī baat magar
sochne vaalā samajhtā hogā

vo jo marne pe tulā hai 'aḳhtar'
us ne jī kar bhī to dekhā hogā

aap se jhuk ke jo milta hoga
us ka qad aap se uncha hoga

nukta-chinon pe jo hansta hoga
us ko apne pe bharosa hoga

wo jo viran phira karta hai
us ke sar mein koi sahra hoga

tum na samjhoge meri baat magar
sochne wala samajhta hoga

wo jo marne pe tula hai 'aKHtar'
us ne ji kar bhi to dekha hoga

Source: Book : 1971 ki Muntakhab Shayri (Pg. 112) Author : Kumar Pashi, Prem Gopal Mittal Publication : P.K. Publishers, New Delhi (1972) Edition : 1972