mat samajhnā ki sirf tū hai yahāñ
ek se ek ḳhūb-rū hai yahāñ

pur hai bāzār-e-husn chehroñ se
jaane kis kis kī aabrū hai yahāñ

kaise ābād ho ye vīrāna
vahshat-e-kizb chār-sū hai yahāñ

aañkh kī putliyoñ ko ġhaur se dekh
terī tasvīr hū-ba-hū hai yahāñ

kaise tārīḳh likkhī jā.egī
sirf talvār aur gulū hai yahāñ

tū kahāñ hai ḳhabar nahīñ ai dost
raat din terī guftugū hai yahāñ

jhāñktā kaun hai girebāñ meñ
ā.īna kis ke rū-ba-rū hai yahāñ

maqtal-e-ārzū hai dil 'vājid'
har tamannā lahū lahū hai yahāñ

mat samajhna ki sirf tu hai yahan
ek se ek KHub-ru hai yahan

pur hai bazar-e-husn chehron se
jaane kis kis ki aabru hai yahan

kaise aabaad ho ye virana
wahshat-e-kizb chaar-su hai yahan

aankh ki putliyon ko ghaur se dekh
teri taswir hu-ba-hu hai yahan

kaise tariKH likkhi jaegi
sirf talwar aur gulu hai yahan

tu kahan hai KHabar nahin ai dost
raat din teri guftugu hai yahan

jhankta kaun hai gireban mein
aaina kis ke ru-ba-ru hai yahan

maqtal-e-arzu hai dil 'wajid'
har tamanna lahu lahu hai yahan

Source: Book : Beesveen Sadi Ki Behtareen Ishqiya Ghazlen (Pg. 220)