sharminda kiyā jauhar-e-bāliġh-nazrī ne
is jins ko bāzār meñ pūchhā na kisī ne

sad shukr kisī kā nahīñ mohtāj-e-karam meñ
ehsān kiyā hai tirī bedād-garī ne

mohtāj thī ā.īne kī tasvīr sī sūrat
tasvīr banāyā mujhe mahfil meñ kisī ne

gul hañste haiñ ġhunche bhī haiñ labrez-e-tabassum
kyā un se kahā jā ke nasīm-e-saharī ne

māyūs na kar de kahīñ un kī nigah-e-garm
ummīd dilā.ī hai mujhe sāda-dilī ne

mehnat hī pe mauqūf hai āsā.ish-e-getī
khoī mirī rāhat mirī rāhat-talabī ne

'vahshat' maiñ nigāhoñ ke tajassus se huuñ āzād
ehsān kiyā mujh pe mirī be-hunarī ne

sharminda kiya jauhar-e-baaligh-nazri ne
is jins ko bazar mein puchha na kisi ne

sad shukr kisi ka nahin mohtaj-e-karam mein
ehsan kiya hai teri bedad-gari ne

mohtaj thi aaine ki taswir si surat
taswir banaya mujhe mahfil mein kisi ne

gul hanste hain ghunche bhi hain labrez-e-tabassum
kya un se kaha ja ke nasim-e-sahari ne

mayus na kar de kahin un ki nigah-e-garm
ummid dilai hai mujhe sada-dili ne

mehnat hi pe mauquf hai aasaish-e-geti
khoi meri rahat meri rahat-talabi ne

'wahshat' main nigahon ke tajassus se hun aazad
ehsan kiya mujh pe meri be-hunari ne

RECITATIONS Nomaan Shauque



00:00/00:00 sharminda kiya jauhar-e-baaligh-nazri ne Nomaan Shauque