lutf-e-nihāñ se jab jab vo muskurā diye haiñ
maiñ ne bhī zaḳhm dil ke un ko dikhā diye haiñ

kuchh harf-e-ārzū thā kuchh yād-e-aish-e-raftā
jitne the naqsh dil meñ ham ne miTā diye haiñ

fart-e-ġham-o-alam se jab dil huā hai giryāñ
us ne ināyatoñ ke dariyā bahā diye haiñ

dekhe haiñ tere tevar dhokā na khā.eñge ab
uThte the valvale kuchh ham ne dabā diye haiñ

us dil-nashīñ adā kā matlab kabhī na samjhe
jab ham ne kuchh kahā hai vo muskurā diye haiñ

shoḳh kar diyā hai chheḌoñ se ham ne tum ko
kuchh hausle hamāre tum ne baḌhā diye haiñ

koī tujh ko dekhe parda uThāne vaale
tū ne tajalliyoñ ke parde girā diye haiñ

kartā huuñ 'vahshat' un se arz-e-niyāz-e-pinhāñ
is kaam ke tarīqe dil ne batā diye haiñ

lutf-e-nihan se jab jab wo muskura diye hain
main ne bhi zaKHm dil ke un ko dikha diye hain

kuchh harf-e-arzu tha kuchh yaad-e-aish-e-rafta
jitne the naqsh dil mein hum ne miTa diye hain

fart-e-gham-o-alam se jab dil hua hai giryan
us ne inayaton ke dariya baha diye hain

dekhe hain tere tewar dhoka na khaenge ab
uThte the walwale kuchh hum ne daba diye hain

us dil-nashin ada ka matlab kabhi na samjhe
jab hum ne kuchh kaha hai wo muskura diye hain

shoKH kar diya hai chheDon se hum ne tum ko
kuchh hausle hamare tum ne baDha diye hain

koi tujh ko dekhe parda uThane wale
tu ne tajalliyon ke parde gira diye hain

karta hun 'wahshat' un se arz-e-niyaz-e-pinhan
is kaam ke tariqe dil ne bata diye hain