zamāne phir na.e sāñche meñ Dhalne vaalā hai
zarā Thahar ki natīja nikalne vaalā hai

abhī hujūm-e-azīzāñ hai zer-e-taḳht-e-murād
magar zamāna chalan to badalne vaalā hai

huī hai nāqa-e-lailā ko sārbāñ kī talāsh
julūs shahr kī galiyoñ meñ chalne vaalā hai

zamīr apnī tamannā ko phir ugal degā
samundaroñ se ye sonā uchhalne vaalā hai

nayā azaab na.ī sub.hoñ kī talāsh meñ hai
ye mulk phir nayā qātil badalne vaalā hai

sadā-e-sub.h-e-bashārat ḳhabar sunā.egī
sulag rahā hai jo siina vo jalne vaalā hai

na.e azaab kī aamad hai aur ham haiñ 'vahīd'
azāb-e-daura-e-hāzir to Talne vaalā hai

zamane phir nae sanche mein Dhalne wala hai
zara Thahar ki natija nikalne wala hai

abhi hujum-e-azizan hai zer-e-taKHt-e-murad
magar zamana chalan to badalne wala hai

hui hai naqa-e-laila ko sarban ki talash
julus shahr ki galiyon mein chalne wala hai

zamir apni tamanna ko phir ugal dega
samundaron se ye sona uchhalne wala hai

naya azab nai subhon ki talash mein hai
ye mulk phir naya qatil badalne wala hai

sada-e-subh-e-bashaarat KHabar sunaegi
sulag raha hai jo sina wo jalne wala hai

nae azab ki aamad hai aur hum hain 'wahid'
azab-e-daura-e-hazir to Talne wala hai

Source: Book : Pakistani Adab (Pg. 717) Author : Dr. Rashid Amjad Publication : Pakistan Academy of Letters, Islambad, Pakistan (2009) Edition : 2009