Subscribe to our newsletter and get our newest updates

Waheed Akhtar

  • Ghazal


safar hi baad-e-safar hai to kyun na ghar jaun


safar hī bād-e-safar hai to kyuuñ na ghar jā.ūñ
mileñ jo gum-shuda rāheñ to lauT kar jā.ūñ

musalsal ek sī gardish se hai qayām achchhā
zamīn Thahre to maiñ bhī kahīñ Thahar jā.ūñ

sameTūñ ḳhud ko to duniyā ko haath se chhoḌūñ
asāsa jamā karūñ maiñ to ḳhud bikhar jā.ūñ

hai ḳhair-ḳhvāhoñ kī talqīn-e-maslahat bhī ajiib
ki zinda rahne ko maiñ jīte-jī hī mar jā.ūñ

sabā ke saath milā mujh ko hukm-e-dar-ba-darī
guloñ kī zid hai mizāj un kā pūchh kar jā.ūñ

mirī uḌaan agar mujh ko nīche aane de
to āsmān kī gahrā.ī meñ utar jā.ūñ

vo kah gayā hai karūñ intizār umr tamām
maiñ us ko DhūñDne niklūñ na apne ghar jā.ūñ

kahāñ uThā.e phirūñ bojh apne sar kā 'vahīd'
ye jis kā qarz hai us ke hī dar pe dhar jā.ūñ

safar hi baad-e-safar hai to kyun na ghar jaun
milen jo gum-shuda rahen to lauT kar jaun

musalsal ek si gardish se hai qayam achchha
zamin Thahre to main bhi kahin Thahar jaun

sameTun KHud ko to duniya ko hath se chhoDun
asasa jama karun main to KHud bikhar jaun

hai KHair-KHwahon ki talqin-e-maslahat bhi ajib
ki zinda rahne ko main jite-ji hi mar jaun

saba ke sath mila mujh ko hukm-e-dar-ba-dari
gulon ki zid hai mizaj un ka puchh kar jaun

meri uDan agar mujh ko niche aane de
to aasman ki gahrai mein utar jaun

wo kah gaya hai karun intizar umr tamam
main us ko DhunDne niklun na apne ghar jaun

kahan uThae phirun bojh apne sar ka 'wahid'
ye jis ka qarz hai us ke hi dar pe dhar jaun

RECITATIONS Nomaan Shauque



00:00/00:00 safar hi baad-e-safar hai to kyun na ghar jaun Nomaan Shauque

Leave a comment

+