nam āñkhoñ meñ kyā kar legā ġhussa dekheñge
os ke uupar chiñgārī kā lahja dekheñge

shīshe ke bāzār se le ā.eñge kuchh chehre
vahī pahan kar ham ghar kā bhī shīsha dekheñge

kitnī duur talak jā.egī zabt kī ye kashtī
kitnā gahrā hai is dard kā dariyā dekheñge

dariyā ke pīchhe pīchhe ham sahrā tak aa.e
kis manzil ko le jaa.e ab sahrā dekheñge

rūThne vaalī ḳhat paḌh kar fauran hī lauT aa.iiñ
ham ne likhā thā sale lagī hai kapḌā dekheñge

kuchh din meñ dil kā kho jaanā bilkul mumkin hai
kahtā hai ham baḌe hue ab duniyā dekheñge

nam aankhon mein kya kar lega ghussa dekhenge
os ke upar chingari ka lahja dekhenge

shishe ke bazar se le aaenge kuchh chehre
wahi pahan kar hum ghar ka bhi shisha dekhenge

kitni dur talak jaegi zabt ki ye kashti
kitna gahra hai is dard ka dariya dekhenge

dariya ke pichhe pichhe hum sahra tak aae
kis manzil ko le jae ab sahra dekhenge

ruThne wali KHat paDh kar fauran hi lauT aain
hum ne likha tha sale lagi hai kapDa dekhenge

kuchh din mein dil ka kho jaana bilkul mumkin hai
kahta hai hum baDe hue ab duniya dekhenge