jis bhī jagah dekhī us ne apnī tasvīr haTā lī thī
mere dil kī dīvāroñ par dīmak lagne vaalī thī

ek parinda uḌne kī koshish meñ gir gir jaatā thā
ghar jaanā thā us ko par vo raat bahut hī kaalī thī

āñgan meñ jo diip qatāroñ meñ rakkhe the dhuāñ hue
havā chalī us raat bahut jab mere ghar dīvālī thī

ik muddat par ghar lauTā thā paas jab us ke baiThā maiñ
mujh meñ bhī maujūd nahīñ thī vo ḳhud meñ bhī ḳhālī thī

'arsh' bahāroñ meñ bhī aayā ek nazāra patjhaḌ kā
sabz shajar ke sabz tane par ik sūkhī sī Daalī thī

jis bhi jagah dekhi us ne apni taswir haTa li thi
mere dil ki diwaron par dimak lagne wali thi

ek parinda uDne ki koshish mein gir gir jata tha
ghar jaana tha us ko par wo raat bahut hi kali thi

aangan mein jo dip qataron mein rakkhe the dhuan hue
hawa chali us raat bahut jab mere ghar diwali thi

ek muddat par ghar lauTa tha pas jab us ke baiTha main
mujh mein bhi maujud nahin thi wo KHud mein bhi KHali thi

'arsh' bahaaron mein bhi aaya ek nazara patjhaD ka
sabz shajar ke sabz tane par ek sukhi si Dali thi