mirī vafā kī mukammal tū dāstāñ kar de
jahāñ pe aag nahīñ hai vahāñ dhuāñ kar de

kahīñ se koī tamannā duā meñ aa na sake
mire ḳhudā tū mire dil ko be-zabāñ kar de

vo jis ke lams se patthar bhī ruuh pā jaa.e
us ek shaḳhs ko mujh par bhī mehrbāñ kar de

bahut sunā hai tere mo.ajazoñ ke baare meñ
mire bhī zaḳhm-e-jigar ko tū kahkashāñ kar de

maiñ apne dil kī har ek baat us se kah dūñgā
sune to suntā rahe vo kahe to haañ kar de

yahāñ pe kuchh na ho bikhrī huī sadā ke sivā
mire vajūd ko ujḌā huā makāñ kar de

maiñ apnī qabr meñ zinda paḌā huā huuñ 'arsh'
alag alag to koī mere jism-o-jāñ kar de

meri wafa ki mukammal tu dastan kar de
jahan pe aag nahin hai wahan dhuan kar de

kahin se koi tamanna dua mein aa na sake
mere KHuda tu mere dil ko be-zaban kar de

wo jis ke lams se patthar bhi ruh pa jae
us ek shaKHs ko mujh par bhi mehrban kar de

bahut suna hai tere moajazon ke bare mein
mere bhi zaKHm-e-jigar ko tu kahkashan kar de

main apne dil ki har ek baat us se kah dunga
sune to sunta rahe wo kahe to han kar de

yahan pe kuchh na ho bikhri hui sada ke siwa
mere wajud ko ujDa hua makan kar de

main apni qabr mein zinda paDa hua hun 'arsh'
alag alag to koi mere jism-o-jaan kar de