marham ke nahīñ haiñ ye taraf-dār namak ke
nikle haiñ mire zaḳhm talabgār namak ke

aayā koī sailāb kahānī meñ achānak
aur ghul ga.e paanī meñ vo kirdār namak ke

donoñ hī kināroñ pe thī bīmāroñ kī majlis
is paar the mīThe ke to us paar namak ke

us ne hī diye zaḳhm ye gardan pe hamārī
phir us ne hī pahnā.e hameñ haar namak ke

kahtī thī ġhazal mujh ko hai marham kī zarūrat
aur dete rahe sab use ash.ār namak ke

jis samt milā kartī thiiñ zaḳhmoñ kī davā.eñ
sunte haiñ ki ab haiñ vahāñ bāzār namak ke

marham ke nahin hain ye taraf-dar namak ke
nikle hain mere zaKHm talabgar namak ke

aaya koi sailab kahani mein achanak
aur ghul gae pani mein wo kirdar namak ke

donon hi kinaron pe thi bimaron ki majlis
is par the miThe ke to us par namak ke

us ne hi diye zaKHm ye gardan pe hamari
phir us ne hi pahnae hamein haar namak ke

kahti thi ghazal mujh ko hai marham ki zarurat
aur dete rahe sab use ashaar namak ke

jis samt mila karti thin zaKHmon ki dawaen
sunte hain ki ab hain wahan bazar namak ke