siine ke daaġh un ko dikhā.e na jā sake
mujh se fasāne ġham ke sunā.e na jā sake

aise nagar meñ merā muqaddar huā muqīm
jis meñ ḳhushī ke diip jalā.e na jā sake

aivān-e-sabr aaj zamīñ-bos ho gayā
palkoñ meñ ashk mujh se chhupā.e na jā sake

ham ne to ḳhūn-e-dil se khilā.e haiñ gulistāñ
tum se to ḳhār-o-ḳhas bhī ugaa.e na jā sake

gulshan jo thā ḳhulūs kā yaksar jhulas gayā
jab nafratoñ ke sho.ale bujhā.e na jā sake

bār-e-garāñ uThātā rahā huuñ magar 'valī'
ehsāñ kisī ke mujh se uThā.e na jā sake

sine ke dagh un ko dikhae na ja sake
mujh se fasane gham ke sunae na ja sake

aise nagar mein mera muqaddar hua muqim
jis mein KHushi ke dip jalae na ja sake

aiwan-e-sabr aaj zamin-bos ho gaya
palkon mein ashk mujh se chhupae na ja sake

hum ne to KHun-e-dil se khilae hain gulistan
tum se to KHar-o-KHas bhi ugae na ja sake

gulshan jo tha KHulus ka yaksar jhulas gaya
jab nafraton ke shoale bujhae na ja sake

bar-e-garan uThata raha hun magar 'wali'
ehsan kisi ke mujh se uThae na ja sake

Source: Book : Izhaar ki faslain (Pg. 70) Author : wali madani Publication : Maktaba-e-sadaf (2013) Edition : 2013