ek do ashk bahātī hai chalī jaatī hai
ab tirī yaad bhī aatī hai chalī jaatī hai

vo mirī dost jise ba.ad mire chāhā thā
mujh se nazroñ ko churātī hai chalī jaatī hai

kabhī dahshat ne bigāḌe the par ab tanhā.ī
ḳhud mire baal banātī hai chalī jaatī hai

sabt kar ke mire māthe pe mirī hū kī mohr
chāñdnī dard baḌhātī hai chalī jaatī hai

ye mohabbat bhī ajab chiiz hai 'zehrā-zaidī'
chand lamhoñ ko sajātī hai chalī jaatī hai

ek do ashk bahati hai chali jati hai
ab teri yaad bhi aati hai chali jati hai

wo meri dost jise baad mere chaha tha
mujh se nazron ko churaati hai chali jati hai

kabhi dahshat ne bigaDe the par ab tanhai
KHud mere baal banati hai chali jati hai

sabt kar ke mere mathe pe meri hu ki mohr
chandni dard baDhati hai chali jati hai

ye mohabbat bhi ajab chiz hai 'zehra-zaidi'
chand lamhon ko sajati hai chali jati hai