dil ne Thokar khā ke samjhā hadisā kyā chiiz hai
ġham kise kahte haiñ dard-e-lā-davā kyā chiiz hai

mahv-e-hairat huuñ ye duniyā se judā kyā chiiz hai
aap kā paiġhām be-harf-o-sadā kyā chiiz hai

is ke ma.anī ḳhud-pasandī ke sivā kuchh bhī nahīñ
dil meñ paiham ḳhvāhish-e-dād-e-vafā kyā chiiz hai

ab añdherā hī añdherā hai ufuq-tā-ba-ufuq
is haqīqat meñ ḳhilāf-e-mājrā kyā chiiz hai

kufr hai ye sochnā bhī kārobār-e-ishq meñ
mudda.ā kyā shai hai tark-e-mudda.ā kyā chiiz hai

sar hai zeb-e-dār lekin lab tabassum-āshnā
haq-navā.ī par maiñ ḳhush huuñ ye sazā kyā chiiz hai

kār-ārā.ī-e-sa.ī-e-shauq hai pesh-e-nazar
varna socho jumbish-e-parda-kushā kyā chiiz hai

ham razā-e-dost meñ raazī haiñ ye sach hai to phir
dekhnā hogā ki dastūr-e-duā kyā chiiz hai

rafta rafta tum pe sab kuchh aa.ina ho jā.egā
kyā batā.ūñ sa.ī-e-tark-e-mudda.ā kyā chiiz hai

jalva-gāh-e-nāz se uThnā koī āsāñ nahīñ
pahle ye dekho yahāñ zanjīr-e-pā kyā chiiz hai

jin kī fitrat nā-shanās-e-zauq-e-mohkam hai 'urūj'
maiñ unheñ ye kaise samjhā.ūñ vafā kyā chiiz hai

dil ne Thokar kha ke samjha hadisa kya chiz hai
gham kise kahte hain dard-e-la-dawa kya chiz hai

mahw-e-hairat hun ye duniya se juda kya chiz hai
aap ka paigham be-harf-o-sada kya chiz hai

is ke mani KHud-pasandi ke siwa kuchh bhi nahin
dil mein paiham KHwahish-e-dad-e-wafa kya chiz hai

ab andhera hi andhera hai ufuq-ta-ba-ufuq
is haqiqat mein KHilaf-e-majra kya chiz hai

kufr hai ye sochna bhi karobar-e-ishq mein
muddaa kya shai hai tark-e-muddaa kya chiz hai

sar hai zeb-e-dar lekin lab tabassum-ashna
haq-nawai par main KHush hun ye saza kya chiz hai

kar-arai-e-sai-e-shauq hai pesh-e-nazar
warna socho jumbish-e-parda-kusha kya chiz hai

hum raza-e-dost mein raazi hain ye sach hai to phir
dekhna hoga ki dastur-e-dua kya chiz hai

rafta rafta tum pe sab kuchh aaina ho jaega
kya bataun sai-e-tark-e-muddaa kya chiz hai

jalwa-gah-e-naz se uThna koi aasan nahin
pahle ye dekho yahan zanjir-e-pa kya chiz hai

jin ki fitrat na-shanas-e-zauq-e-mohkam hai 'uruj'
main unhen ye kaise samjhaun wafa kya chiz hai

Source: Book : Lahje ke Chiraag (Pg. 76) Author : Urooj Zaidi Publication : Irfan Zaidi, Rampur (1989) Edition : 1989