Subscribe to our newsletter and get our newest updates

Zaheer Siddiqui

  • Ghazal


han wo main hi tha ki jis ne KHwab Dhoya subh tak


haañ vo maiñ hī thā ki jis ne ḳhvāb Dhoyā sub.h tak
kaun thā vo jo mire bistar pe soyā sub.h tak

raat bhar kamre meñ maiñ dubkā rahā aur āsmāñ
merī furqat meñ mire āñgan meñ royā sub.h tak

balb raushan thā andhere ko ijāzat thī nahīñ
phir bhī vo bistar ke nīche ḳhuub soyā sub.h tak

log akḌī piiTh le kar daftaroñ se chal paḌe
mez kursī ko milā ārām goyā sub.h tak

chāñdnī shabnam havā kī barchhiyāñ chalne ko haiñ
din ga.e kyuuñ aa.e ho jaao ruko yā sub.h tak

itne chehroñ meñ mujhe hai ek chehre kī talāsh
jis ko maiñ ne kho ke paayā pā ke khoyā sub.h tak

hijr kī shab un kī aamad ke tasavvur meñ 'zahīr'
muntazir ā.ankhoñ ne dāman hī bhigoyā sub.h tak

han wo main hi tha ki jis ne KHwab Dhoya subh tak
kaun tha wo jo mere bistar pe soya subh tak

raat bhar kamre mein main dubka raha aur aasman
meri furqat mein mere aangan mein roya subh tak

balb raushan tha andhere ko ijazat thi nahin
phir bhi wo bistar ke niche KHub soya subh tak

log akDi piTh le kar daftaron se chal paDe
mez kursi ko mila aaram goya subh tak

chandni shabnam hawa ki barchhiyan chalne ko hain
din gae kyun aae ho jao ruko ya subh tak

itne chehron mein mujhe hai ek chehre ki talash
jis ko main ne kho ke paya pa ke khoya subh tak

hijr ki shab un ki aamad ke tasawwur mein 'zahir'
muntazir aaankhon ne daman hi bhigoya subh tak


Source: Book : Roshan Waraq Waraq (Pg. 43)

Leave a comment

+