ā.īna-e-vahshat ko jilā jis se milī hai
vo gard rah-e-tark-e-marāsim se uThī hai

sadiyoñ ke tasalsul meñ kahīñ gardish-e-daurāñ
pahle bhī kahīñ tujh se mulāqāt huī hai

ai karb-o-balā ḳhush ho na.ī nasl ne ab ke
ḳhud apne lahū se tirī tārīḳh likhī hai

us kaj-kulah-e-ishq ko ai mashq-e-sitam dekh
sar tan pe nahīñ phir bhī vahī sarv-qadī hai

kis raah se tujh tak ho rasā.ī ki har ik samt
duniyā kisī dīvār ke mānind khaḌī hai

zindāñ kī fasīleñ hoñ ki maqtal kī fazā.eñ
raftār-e-junūñ bhī kahīñ roke se rukī hai

jis ruup meñ jab chāhe jise Dhaal de 'ummīd'
duniyā bhī ajab kār-gah-e-kūza-garī hai

aaina-e-wahshat ko jila jis se mili hai
wo gard rah-e-tark-e-marasim se uThi hai

sadiyon ke tasalsul mein kahin gardish-e-dauran
pahle bhi kahin tujh se mulaqat hui hai

ai karb-o-bala KHush ho nai nasl ne ab ke
KHud apne lahu se teri tariKH likhi hai

us kaj-kulah-e-ishq ko ai mashq-e-sitam dekh
sar tan pe nahin phir bhi wahi sarw-qadi hai

kis rah se tujh tak ho rasai ki har ek samt
duniya kisi diwar ke manind khaDi hai

zindan ki fasilen hon ki maqtal ki fazaen
raftar-e-junun bhi kahin roke se ruki hai

jis rup mein jab chahe jise Dhaal de 'ummid'
duniya bhi ajab kar-gah-e-kuza-gari hai

Source: Rooh-e-Ghazal,Pachas Sala Intekhab