banā ke vahm o gumāñ kī duniyā haqīqatoñ ke sarāb dekhūñ
maiñ apne hī ā.īne meñ ḳhud ko jahāñ bhī dekhūñ ḳharāb dekhūñ

ye kis ke saa.e ne rafta rafta ik aks mauhūm kar diyā hai
adam agar hai vajūd merā to roz o shab kyuuñ azaab dekhūñ

badal badal ke har ek pahlū fasāna kyā kyā banā rahā hai
bahut se kirdār aa.e hoñge magar koī intiḳhāb dekhūñ

ye mere sāthī haiñ pyāre sāthī magar inheñ bhī nahīñ gavārā
maiñ apnī vahshat ke maqbare se na.ī tamannā ke ḳhvāb dekhūñ

maiñ chāhtā huuñ badal duuñ 'manzar' purāne naqsh o nigār saare
ki sarhad-e-jism-o-jāñ se aage nayā koī iztirāb dekhūñ

bana ke wahm o guman ki duniya haqiqaton ke sarab dekhun
main apne hi aaine mein KHud ko jahan bhi dekhun KHarab dekhun

ye kis ke sae ne rafta rafta ek aks mauhum kar diya hai
adam agar hai wajud mera to roz o shab kyun azab dekhun

badal badal ke har ek pahlu fasana kya kya bana raha hai
bahut se kirdar aae honge magar koi intiKHab dekhun

ye mere sathi hain pyare sathi magar inhen bhi nahin gawara
main apni wahshat ke maqbare se nai tamanna ke KHwab dekhun

main chahta hun badal dun 'manzar' purane naqsh o nigar sare
ki sarhad-e-jism-o-jaan se aage naya koi iztirab dekhun

RECITATIONS Umair Manzar



00:00/00:00 bana ke wahm o guman ki duniya haqiqaton ke sarab dekhun Umair Manzar