vo sar-e-shām ga.e hijr kī hai raat shurūa
ashk jaarī haiñ huā mausam-e-barsāt shurūa

jazba-e-dil ne mire kuchh to karī hai tāsīr
phir hue un ke jo altāf-o-ināyāt shurūa

mujh ko dikhlāo na tum rañg-e-hinā us ko jalāo
bhejnī jis ne karī tum ko ye sauġhāt shurūa

kabhū vahshat kabhū shiddat kabhū ġham kī kasrat
ki jo pahle the hue phir vo hī hālāt shurūa

log nazroñ pe chaḌhāte haiñ ḳhudā ḳhair kare
phir na.e sar se hai kī us ne mulāqāt shurūa

hijr kī shab ye qayāmat hai kaTī ai 'tanvīr'
sub.h ho jaa.e karo aisī koī baat shurūa

wo sar-e-sham gae hijr ki hai raat shurua
ashk jari hain hua mausam-e-barsat shurua

jazba-e-dil ne mere kuchh to kari hai tasir
phir hue un ke jo altaf-o-inayat shurua

mujh ko dikhlao na tum rang-e-hina us ko jalao
bhejni jis ne kari tum ko ye saughat shurua

kabhu wahshat kabhu shiddat kabhu gham ki kasrat
ki jo pahle the hue phir wo hi haalat shurua

log nazron pe chaDhate hain KHuda KHair kare
phir nae sar se hai ki us ne mulaqat shurua

hijr ki shab ye qayamat hai kaTi ai 'tanwir'
subh ho jae karo aisi koi baat shurua

Source: Intikhab-e-Sukhan,Volume-001