aaj itnā jalāo ki pighal jaa.e mirā jism
shāyad isī sūrat hī sukūñ paa.e mirā jism

āġhosh meñ le kar mujhe is zor se bheñcho!
shīshe kī tarah chhan se chaTaḳh jaa.e mirā jism

yā da.ava-e-mahtāb-e-tajallī na kare vo
yā nuur kī kirnoñ se vo nahlā.e mirā jism

kis shahr-e-tilismāt meñ le aayā taḳhayyul
jis samt nazar jaa.e nazar aa.e mirā jism

ā.īne kī sūrat meñ mirī zaat ke do ruḳh
jaañ mahv-e-fuġhāñ hai to ġhazal gaa.e mirā jism

'tanvīr' paḌho ism koī radd-e-balā kā
ghere meñ liye baiThe haiñ kuchh saa.e mirā jism

aaj itna jalao ki pighal jae mera jism
shayad isi surat hi sukun pae mera jism

aaghosh mein le kar mujhe is zor se bhencho!
shishe ki tarah chhan se chaTaKH jae mera jism

ya dawa-e-mahtab-e-tajalli na kare wo
ya nur ki kirnon se wo nahlae mera jism

kis shahr-e-tilismat mein le aaya taKHayyul
jis samt nazar jae nazar aae mera jism

aaine ki surat mein meri zat ke do ruKH
jaan mahw-e-fughan hai to ghazal gae mera jism

'tanwir' paDho ism koi radd-e-bala ka
ghere mein liye baiThe hain kuchh sae mera jism

Source: Book : Beesveen Sadi Ki Behtareen Ishqiya Ghazlen (Pg. 66)