tarīq koī na aayā mujhe zamāne kā
ki ek saudā rahā jins-e-dil luTāne kā

fareb-e-ḳhvāb mire rāste ko rok nahīñ
ki vaqt-e-shām hai ye ġham-kade ko jaane kā

tire vajūd se pahchān mujh ko apnī thī
tirā yaqīn thā mujh ko yaqīñ zamāne kā

ḳharāb-e-ishq huuñ ḳhud maut huuñ maiñ apne liye
sikhā rahī huuñ hunar ḳhud ko dil jalāne kā

har ek shāḳh-e-sitam se maiñ phuul toḌtī huuñ
huā hai shauq chaman-zār-e-ġham banāne kā

nasha ajiib hai is jañg-e-be-samar kā mujhe
ḳhumār ḳhuub hai ḳhūn-e-ḳhirad bahāne kā

shab-e-visāl meñ ik nuqta-e-tavaqquf huuñ
aur ik junūñ hai use manziloñ ko paane kā

dil-e-tabāh ko be-dām bech detī huuñ
ki kārobār hai ye jins-e-ġham kamāne kā

mujhe aziiz hai be-ehtiyātī-e-sāda
na shauq hai na hunar us ko āzmāne kā

qafas badan kā mujhe kuchh mirā subūt nahīñ
ye tā.ir-e-dil-o-jāñ lauT kar na aane kā

tariq koi na aaya mujhe zamane ka
ki ek sauda raha jins-e-dil luTane ka

fareb-e-KHwab mere raste ko rok nahin
ki waqt-e-sham hai ye gham-kade ko jaane ka

tere wajud se pahchan mujh ko apni thi
tera yaqin tha mujh ko yaqin zamane ka

KHarab-e-ishq hun KHud maut hun main apne liye
sikha rahi hun hunar KHud ko dil jalane ka

har ek shaKH-e-sitam se main phul toDti hun
hua hai shauq chaman-zar-e-gham banane ka

nasha ajib hai is jang-e-be-samar ka mujhe
KHumar KHub hai KHun-e-KHirad bahane ka

shab-e-visal mein ek nuqta-e-tawaqquf hun
aur ek junun hai use manzilon ko pane ka

dil-e-tabah ko be-dam bech deti hun
ki karobar hai ye jins-e-gham kamane ka

mujhe aziz hai be-ehtiyati-e-sada
na shauq hai na hunar us ko aazmane ka

qafas badan ka mujhe kuchh mera subut nahin
ye tair-e-dil-o-jaan lauT kar na aane ka

Source: Book : siip-volume-47 (Pg. 53)