ishq se kuchh kaam ne kuchh kū-e-jānāñ se ġharaz
gul se matlab hai na kuchh ḳhār-e-bayābāñ se ġharaz

ishq kī sarkār ko bebāk bilkul kar chuke
ab na kuchh zanjīr se matlab na zindāñ se ġharaz

kis se ham jhagḌeñ nahīñ apnā kisī millat meñ mel
ishq ke bande ko kyā gabr-o-musalmāñ se ġharaz

ālam-e-vahshat meñ uryānī kā jaama chāhiye
kaam hāthoñ ko garebāñ se na dāmāñ se ġharaz

terī nazroñ meñ na Thahregā ye rū-e-āftāb
tujh ko ai 'aḳhtar' na hogī māh-e-tābāñ se ġharaz

ishq se kuchh kaam ne kuchh ku-e-jaanan se gharaz
gul se matlab hai na kuchh KHar-e-bayaban se gharaz

ishq ki sarkar ko bebak bilkul kar chuke
ab na kuchh zanjir se matlab na zindan se gharaz

kis se hum jhagDen nahin apna kisi millat mein mel
ishq ke bande ko kya gabr-o-musalman se gharaz

aalam-e-wahshat mein uryani ka jama chahiye
kaam hathon ko gareban se na daman se gharaz

teri nazron mein na Thahrega ye ru-e-aftab
tujh ko ai 'aKHtar' na hogi mah-e-taban se gharaz

Source: Intikhab-e-wajid ali shah akhtar