Subscribe to our newsletter and get our newest updates

Laiq Aajiz

  • Ghazal


zamana DhunD raha tha kidhar gaya pani


zamāna DhūñD rahā thā kidhar gayā paanī
kisī kā hukm huā to Thahar gayā paanī

vo dhuup thī ki zamīñ jal ke raakh ho jaatī
baras ke ab ke baḌā kaam kar gayā paanī

baḌā ġhurūr thā apnī chamak-damak pe use
sunār ne jo tapāyā utar gayā paanī

ḳhudā kā ḳhauf nahīñ ab tumhāre zehnoñ meñ
tavahhumāt kā is tarah bhar gayā paanī

shikast-ḳhurda ye qaumeñ tumheñ miTā deñgī
agar tumhārī hamiyyat kā mar gayā paanī

taras na aayā ġharīboñ ke haal par 'ājiz'
sisakte paudoñ ke sar se guzar gayā paanī

zamana DhunD raha tha kidhar gaya pani
kisi ka hukm hua to Thahar gaya pani

wo dhup thi ki zamin jal ke rakh ho jati
baras ke ab ke baDa kaam kar gaya pani

baDa ghurur tha apni chamak-damak pe use
sunar ne jo tapaya utar gaya pani

KHuda ka KHauf nahin ab tumhaare zehnon mein
tawahhumat ka is tarah bhar gaya pani

shikast-KHurda ye qaumen tumhein miTa dengi
agar tumhaari hamiyyat ka mar gaya pani

taras na aaya gharibon ke haal par 'ajiz'
sisakte paudon ke sar se guzar gaya pani


Leave a comment

+