Subscribe to our newsletter and get our newest updates

Zaheer Kashmiri

  • Ghazal


ab ishq se lau lagaenge hum


ab ishq se lau lagā.eñge ham
ab dil ke bhī kaam ā.eñge ham

jab jhuTpuTā hogā shām-e-ġham kā
palkoñ pe diye jalā.eñge ham

ham ban ga.e haiñ adā tumhārī
chheḌoge to ruuTh jā.eñge ham

ai mūnis-e-dil ai hijr kī raat
le chal diye ab na ā.eñge ham

kyā baiThe-biThā.e ho gayā hai
pūchheñge to kyā batā.eñge ham

vo aañkh baḌī jahāñ-numā hai
us aañkh se kyā chhupā.eñge ham

sahrā to 'zahīr' tañg niklā
ab dekheñ kidhar ko jā.eñge ham

ab ishq se lau lagaenge hum
ab dil ke bhi kaam aaenge hum

jab jhuTpuTa hoga sham-e-gham ka
palkon pe diye jalaenge hum

hum ban gae hain ada tumhaari
chheDoge to ruTh jaenge hum

ai munis-e-dil ai hijr ki raat
le chal diye ab na aaenge hum

kya baiThe-biThae ho gaya hai
puchhenge to kya bataenge hum

wo aankh baDi jahan-numa hai
us aankh se kya chhupaenge hum

sahra to 'zahir' tang nikla
ab dekhen kidhar ko jaenge hum


Source: Book : kulliyat-e-zahiir (Pg. 60)

Leave a comment

+