rasm hī shahr-e-tamannā se vafā kī uTh jaa.e
is tarah to na koī ahl-e-mohabbat ko satā.e

vādi-e-dil meñ ka.ī rātoñ se sannāTā hai
kaash bijlī hī tire abr-e-sitam se gir jaa.e

apnī zillat kī salīb aap liye phirnā hai
ye baḌā bojh mohabbat ke sivā kaun uThā.e

bar-sar-e-jañg haiñ anvār se zulmāt ke dev
chāñd rātoñ ke añdhere meñ kahīñ Duub na jaa.e

ye samajh lo ki rag-e-jāñ meñ hai zahrāb-e-junūñ
jab nigāh-e-karam-o-lutf se bhī dil dukh jaa.e

dasht-e-ummīd meñ jaltā hai mire ḳhuuñ kā charāġh
raah manzil kī kaho mere sivā kaun dikhā.e

bārish-e-sañg-e-malāmat hai ḳhirad kā pathrāv
apne sar se ho jise pyaar mire saath na aa.e

rasm hi shahr-e-tamanna se wafa ki uTh jae
is tarah to na koi ahl-e-mohabbat ko satae

wadi-e-dil mein kai raaton se sannaTa hai
kash bijli hi tere abr-e-sitam se gir jae

apni zillat ki salib aap liye phirna hai
ye baDa bojh mohabbat ke siwa kaun uThae

bar-sar-e-jang hain anwar se zulmat ke dew
chand raaton ke andhere mein kahin Dub na jae

ye samajh lo ki rag-e-jaan mein hai zahrab-e-junun
jab nigah-e-karam-o-lutf se bhi dil dukh jae

dasht-e-ummid mein jalta hai mere KHun ka charagh
rah manzil ki kaho mere siwa kaun dikhae

barish-e-sang-e-malamat hai KHirad ka pathraw
apne sar se ho jise pyar mere sath na aae

Source: Funoon(Jadeed Ghazal Number: Volume-002)