mirī judā.ī meñ aañsū bahā.e jaate haiñ
ye fitna merī lahad par jagā.e jaate haiñ

ziyā-e-husn ko dargāh-e-dil tarastī hai
charāġh dair-o-haram meñ jalā.e jaate haiñ

nahīñ satāte kisī ko bhī jo zamāne meñ
vahī zamāne meñ akasr satā.e jaate haiñ

ziyā-e-husn se hotā hai jin kā dil ma.amūr
charāġh gor par un kī jalā.e jaate haiñ

fasānoñ se nahīñ bantīñ haqīqateñ lekin
haqīqatoñ se fasāne banā.e jaate haiñ

kahīñ ġhurūr takabbur kahīñ futūr-e-ḳhudī
hamārī raah meñ rahzan biThā.e jaate haiñ

adab kī mahfil-e-rañgīñ meñ rāt-din 'fāriġh'
mire fasāne hī akasr sunā.e jaate haiñ

meri judai mein aansu bahae jate hain
ye fitna meri lahad par jagae jate hain

ziya-e-husn ko dargah-e-dil tarasti hai
charagh dair-o-haram mein jalae jate hain

nahin satate kisi ko bhi jo zamane mein
wahi zamane mein akasr satae jate hain

ziya-e-husn se hota hai jin ka dil mamur
charagh gor par un ki jalae jate hain

fasanon se nahin bantin haqiqaten lekin
haqiqaton se fasane banae jate hain

kahin ghurur takabbur kahin futur-e-KHudi
hamari rah mein rahzan biThae jate hain

adab ki mahfil-e-rangin mein raat-din 'farigh'
mere fasane hi akasr sunae jate hain

Source: Book : Ehsasat-e-Farigh (Pg. 5) Publication : Laxmi Narayan Farigh