Subscribe to our newsletter and get our newest updates

Jameel Yusuf

  • Ghazal


KHud apni zat ka nam-o-nishan bhul gae


ḳhud apnī zaat kā nām-o-nishān bhuul ga.e
rihā hue to parinde uḌaan bhuul ga.e

is inhimāk se kār-e-zamīñ meñ mahv hue
zamīñ pe chhāyā huā āsmān bhuul ga.e

har imtihān meñ pahlā sabaq to yaad aayā
kitāb-e-ishq kahīñ darmiyān bhuul ga.e

na Thaharnā hī munāsib na uTh ke jaanā hī
balā ke ghar meñ hameñ mezbān bhuul ga.e

us ajnabī kī rifāqat meñ aisī ḳhushbū thī
ham apne saare safar kī thakān bhuul ga.e

na kar numūd kī ḳhvāhish ki ye jahāñ vaale
baḌe-baḌoñ kā bhī nām-o-nishān bhuul ga.e

kuchh is tarah ġham-e-umr-e-ravāñ ne ḳhaak kiyā
firāq-o-vasl kī sab dāstān bhuul ga.e

KHud apni zat ka nam-o-nishan bhul gae
riha hue to parinde uDan bhul gae

is inhimak se kar-e-zamin mein mahw hue
zamin pe chhaya hua aasman bhul gae

har imtihan mein pahla sabaq to yaad aaya
kitab-e-ishq kahin darmiyan bhul gae

na Thaharna hi munasib na uTh ke jaana hi
bala ke ghar mein hamein mezban bhul gae

us ajnabi ki rifaqat mein aisi KHushbu thi
hum apne sare safar ki thakan bhul gae

na kar numud ki KHwahish ki ye jahan wale
baDe-baDon ka bhi nam-o-nishan bhul gae

kuchh is tarah gham-e-umr-e-rawan ne KHak kiya
firaq-o-wasl ki sab dastan bhul gae


Source: Book : Muntakhab Gazle.n (Pg. 64) Author : Nasir Zaidi Publication : Zahid Malik (1983) Edition : 1983

Leave a comment

+