Subscribe to our newsletter and get our newest updates

Hafiz Taib

  • Ghazal


ek naya karb mere dil mein janam leta hai


ik nayā karb mire dil meñ janam letā hai
qāfila dard kā kuchh der jo dam letā hai

rañg paatā hai mire ḳhūn-e-jigar se gul-e-sher
sabza-e-fikr mirī aañkh se nam letā hai

aabrū haqq-o-sadāqat kī baḌhā detā hai
jab bhī suqrāt koī sāġhar-e-sam letā hai

raat ke saa.e meñ shabnam ke guhar Dhalte haiñ
raat kī kokh se ḳhurshīd janam letā hai

zehn be-nām dhuñdlakoñ meñ bhaTak jaatā hai
aaj fankār jo hāthoñ meñ qalam letā hai

jis ko ho daulat-e-ehsās mayassar 'tā.ib'
chain vo kār-gah-e-zīst meñ kam letā hai

ek naya karb mere dil mein janam leta hai
qafila dard ka kuchh der jo dam leta hai

rang pata hai mere KHun-e-jigar se gul-e-sher
sabza-e-fikr meri aankh se nam leta hai

aabru haqq-o-sadaqat ki baDha deta hai
jab bhi suqraat koi saghar-e-sam leta hai

raat ke sae mein shabnam ke guhar Dhalte hain
raat ki kokh se KHurshid janam leta hai

zehn be-nam dhundlakon mein bhaTak jata hai
aaj fankar jo hathon mein qalam leta hai

jis ko ho daulat-e-ehsas mayassar 'taib'
chain wo kar-gah-e-zist mein kam leta hai


Source: Funoon(Jadeed Ghazal Number: Volume-002)

Leave a comment

+