bazm-e-jāñ phir nigah-e-tauba-shikan māñge hai
lams sho.ale kā to ḳhushbū kā badan māñge hai

qad-o-gesū kī sharī.at kā vo munkir bhī nahīñ
aur phir apne liye dār-o-rasan māñge hai

raqs-e-kākul ke tasavvur kī ye shīrīñ saa.at
shab ke phūloñ se mahaktā huā ban māñge hai

TūTte haiñ to bikhar jaate haiñ miTTī ke hurūf
zindagī jin se charāġhoñ kā chalan māñge hai

jis ko ghere hue rahte haiñ havāoñ ke hisār
sham-e-jāñ mujh se vahī dil kī lagan māñge hai

muskurāhaT vo ki phūloñ pe shakar barsāve
naaz us reshmī māthe pe shikan māñge hai

phuul afsāna bhī afsūñ bhī hai lekin 'tanvīr'
chashm-e-ḳhūñ-basta nayā tarz-e-suḳhan māñge hai

bazm-e-jaan phir nigah-e-tauba-shikan mange hai
lams shoale ka to KHushbu ka badan mange hai

qad-o-gesu ki shariat ka wo munkir bhi nahin
aur phir apne liye dar-o-rasan mange hai

raqs-e-kakul ke tasawwur ki ye shirin saat
shab ke phulon se mahakta hua ban mange hai

TuTte hain to bikhar jate hain miTTi ke huruf
zindagi jin se charaghon ka chalan mange hai

jis ko ghere hue rahte hain hawaon ke hisar
sham-e-jaan mujh se wahi dil ki lagan mange hai

muskurahaT wo ki phulon pe shakar barsawe
naz us reshmi mathe pe shikan mange hai

phul afsana bhi afsun bhi hai lekin 'tanwir'
chashm-e-KHun-basta naya tarz-e-suKHan mange hai

Source: Raqs-e-lamhaat