yā mujhe afsar-e-shāhāna banāyā hotā
yā mirā taaj gadāyāna banāyā hotā

apnā dīvāna banāyā mujhe hotā tū ne
kyuuñ ḳhirad-mand banāyā na banāyā hotā

ḳhāksārī ke liye garche banāyā thā mujhe
kaash ḳhāk-e-dar-e-jānāna banāyā hotā

nashsha-e-ishq kā gar zarf diyā thā mujh ko
umr kā tañg na paimāna banāyā hotā

dil-e-sad-chāk banāyā to balā se lekin
zulf-e-mushkīñ kā tire shāna banāyā hotā

sūfiyoñ ke jo na thā lā.eq-e-sohbat to mujhe
qābil-e-jalsa-e-rindāna banāyā hotā

thā jalānā hī agar dūri-e-sāqī se mujhe
to charāġh-e-dar-e-mai-ḳhāna banāyā hotā

shola-e-husn chaman meñ na dikhāyā us ne
varna bulbul ko bhī parvāna banāyā hotā

roz māmūra-e-duniyā meñ ḳharābī hai 'zafar'
aisī bastī ko to vīrāna banāyā hotā

ya mujhe afsar-e-shahana banaya hota
ya mera taj gadayana banaya hota

apna diwana banaya mujhe hota tu ne
kyun KHirad-mand banaya na banaya hota

KHaksari ke liye garche banaya tha mujhe
kash KHak-e-dar-e-jaanana banaya hota

nashsha-e-ishq ka gar zarf diya tha mujh ko
umr ka tang na paimana banaya hota

dil-e-sad-chaak banaya to bala se lekin
zulf-e-mushkin ka tere shana banaya hota

sufiyon ke jo na tha laeq-e-sohbat to mujhe
qabil-e-jalsa-e-rindana banaya hota

tha jalana hi agar duri-e-saqi se mujhe
to charagh-e-dar-e-mai-KHana banaya hota

shola-e-husn chaman mein na dikhaya us ne
warna bulbul ko bhi parwana banaya hota

roz mamura-e-duniya mein KHarabi hai 'zafar'
aisi basti ko to virana banaya hota

Videos
This video is playing from YouTube Videos
This video is playing from YouTube Mehdi Hasan Habib Wali Mohammad RECITATIONS Nomaan Shauque



00:00/00:00 ya mujhe afsar-e-shahana banaya hota Nomaan Shauque