usī ke jalve the lekin visāl-e-yār na thā
maiñ us ke vāste kis vaqt be-qarār na thā

koī jahān meñ kyā aur tarah-dār na thā
tirī tarah mujhe dil par to iḳhtiyār na thā

ḳhirām jalve ke naqsh-e-qadam the lāla-o-gul
kuchh aur us ke sivā mausam-e-bahār na thā

vo kaun nāla-e-dil thā qafas meñ ai sayyād
ki misl-e-tīr-e-nazar āsmāñ shikār na thā

ġhalat hai hukm-e-jahannam kise huā hogā
ki mujh se baḌh ke to koī gunāhgār na thā

vafūr-e-be-ḳhudī-e-bazm-e-mai na pūchho raat
koī ba-juz nigah-e-yār hoshiyār na thā

lahad ko khol ke dekho to ab kafan bhī nahīñ
koī libās na thā jo ki musta.ār na thā

to mahv-e-gul-ban-o-gulzār ho gayā 'āsī'
tirī nazar meñ jamāl-e-ḳhayāl-e-yār na thā

usi ke jalwe the lekin visal-e-yar na tha
main us ke waste kis waqt be-qarar na tha

koi jahan mein kya aur tarah-dar na tha
teri tarah mujhe dil par to iKHtiyar na tha

KHiram jalwe ke naqsh-e-qadam the lala-o-gul
kuchh aur us ke siwa mausam-e-bahaar na tha

wo kaun nala-e-dil tha qafas mein ai sayyaad
ki misl-e-tir-e-nazar aasman shikar na tha

ghalat hai hukm-e-jahannam kise hua hoga
ki mujh se baDh ke to koi gunahgar na tha

wafur-e-be-KHudi-e-bazm-e-mai na puchho raat
koi ba-juz nigah-e-yar hoshiyar na tha

lahad ko khol ke dekho to ab kafan bhi nahin
koi libas na tha jo ki mustaar na tha

to mahw-e-gul-ban-o-gulzar ho gaya 'asi'
teri nazar mein jamal-e-KHayal-e-yar na tha

Source: Book : Intekhab-e-kalam Aasi Ghazipuri (Pg. 16) Author : Tayyab Abdali Publication : Urdu Acadami uttarpradesh (2009) Edition : 2009