aisī tez havā aur aisī raat nahīñ dekhī
lekin ham ne maulā jaisī zaat nahīñ dekhī

us kī shān-e-ajīb kā manzar dekhne vaalā hai
ik aisā ḳhurshīd ki jis ne raat nahīñ dekhī

bistar par maujūd rahe aur sair-e-haft-aflāk
aisī kisī par rahmat kī barsāt nahīñ dekhī

us kī aal vahī jo us ke naqsh-e-qadam par
sirf zaat kī ham ne āl-e-sādāt nahīñ dekhī

ek shajar hai jis kī shāḳheñ phailtī jaatī haiñ
kisī shajar meñ ham ne aisī baat nahīñ dekhī

ik dariyā-e-rahmat hai jo bahtā jaatā hai
ye shān-e-barkāt kisī ke saath nahīñ dekhī

shāhoñ kī tārīḳh bhī ham ne dekhī hai lekin
us ke dar ke gadāoñ vaalī baat nahīñ dekhī

us ke naam pe māreñ khānā ab e.azāz hamārā
aur kisī kī ye izzat auqāt nahīñ dekhī

sadiyoñ kī is dhuup chhāñv meñ koī hameñ batlā.e
puurī huī kaun sī us kī baat nahīñ dekhī

ahl-e-zamīñ ne kaun sā ham par zulm nahīñ Dhāyā
kaun sī nusrat ham ne us ke haath nahīñ dekhī

aisi tez hawa aur aisi raat nahin dekhi
lekin hum ne maula jaisi zat nahin dekhi

us ki shan-e-ajib ka manzar dekhne wala hai
ek aisa KHurshid ki jis ne raat nahin dekhi

bistar par maujud rahe aur sair-e-haft-aflak
aisi kisi par rahmat ki barsat nahin dekhi

us ki aal wahi jo us ke naqsh-e-qadam par
sirf zat ki hum ne aal-e-sadat nahin dekhi

ek shajar hai jis ki shaKHen phailti jati hain
kisi shajar mein hum ne aisi baat nahin dekhi

ek dariya-e-rahmat hai jo bahta jata hai
ye shan-e-barkat kisi ke sath nahin dekhi

shahon ki tariKH bhi hum ne dekhi hai lekin
us ke dar ke gadaon wali baat nahin dekhi

us ke nam pe maren khana ab eazaz hamara
aur kisi ki ye izzat auqat nahin dekhi

sadiyon ki is dhup chhanw mein koi hamein batlae
puri hui kaun si us ki baat nahin dekhi

ahl-e-zamin ne kaun sa hum par zulm nahin Dhaya
kaun si nusrat hum ne us ke hath nahin dekhi

Source: Book : Veeran sarai ka diya (Pg. 85)