fitna-e-rozgār kī bāteñ
aisī haiñ jaise yaar kī bāteñ

hijr meñ vasl-e-yār kī bāteñ
haiñ ḳhizāñ meñ bahār kī bāteñ

lāla-o-gul kai zikr se behtar
ek jān-e-bahār kī bāteñ

chheḌ ke saath nok jhok bhī hai
gul se hotī haiñ ḳhaar kī bāteñ

sab samajhte haiñ maiñ kahūñ na kahūñ
is dil-e-be-qarār kī bāteñ

chheḌ detā huuñ dil-lagī ke liye
vasl meñ intizār kī bāteñ

jo na tum rūThte to kar lete
aur do chaar pyaar kī bāteñ

nañg haiñ azm-e-mustaqil ke liye
dahr-nā-pā.edār kī bāteñ

dil-nashīñ haiñ basant meñ 'kaifī'
ye sharāb-o-ḳhumār kī bāteñ

fitna-e-rozgar ki baaten
aisi hain jaise yar ki baaten

hijr mein wasl-e-yar ki baaten
hain KHizan mein bahaar ki baaten

lala-o-gul kai zikr se behtar
ek jaan-e-bahaar ki baaten

chheD ke sath nok jhok bhi hai
gul se hoti hain KHar ki baaten

sab samajhte hain main kahun na kahun
is dil-e-be-qarar ki baaten

chheD deta hun dil-lagi ke liye
wasl mein intizar ki baaten

jo na tum ruThte to kar lete
aur do chaar pyar ki baaten

nang hain azm-e-mustaqil ke liye
dahr-na-paedar ki baaten

dil-nashin hain basant mein 'kaifi'
ye sharab-o-KHumar ki baaten

Source: Khumnistan-e-kaifi