dil ko kyā yaar ke paikān liye baiThe haiñ
sāhab-e-ḳhāna ko mehmān liye baiThe haiñ

shor kyūñkar na lab-e-zaḳhm-e-jigar se uTThe
sunte haiñ phir vo namak-dān liye baiThe haiñ

dam laboñ par hai yahāñ shauq-e-shahādat merā
ghar meñ vo ḳhanjar-e-burrān liye baiThe haiñ

sog ne un ke hazāroñ ko kiyā saudā.ī
vo abhī zulf-e-pareshāñ liye baiThe haiñ

dil-e-pur-dāġh se bahlāte haiñ jī ko us bin
ham ye pahlū meñ gulistān liye baiThe haiñ

uThte hī pahlū se us parda-nashīñ ke ham bhī
chashm par gosha-e-dāmān liye baiThe haiñ

kal to ka.abe ko chale hazrat-e-'tanvīr' the lo
aaj mai-noshī kā sāmān liye baiThe haiñ

dil ko kya yar ke paikan liye baiThe hain
sahab-e-KHana ko mehman liye baiThe hain

shor kyunkar na lab-e-zaKHm-e-jigar se uTThe
sunte hain phir wo namak-dan liye baiThe hain

dam labon par hai yahan shauq-e-shahadat mera
ghar mein wo KHanjar-e-burran liye baiThe hain

sog ne un ke hazaron ko kiya saudai
wo abhi zulf-e-pareshan liye baiThe hain

dil-e-pur-dagh se bahlate hain ji ko us bin
hum ye pahlu mein gulistan liye baiThe hain

uThte hi pahlu se us parda-nashin ke hum bhi
chashm par gosha-e-daman liye baiThe hain

kal to kabe ko chale hazrat-e-'tanwir' the lo
aaj mai-noshi ka saman liye baiThe hain

Source: Intikhab-e-Sukhan,Volume-001