dushmanoñ ko dost bhaa.ī ko sitamgar kah diyā
log kyuuñ barham haiñ kyā shīshe ko patthar kah diyā

is liye mujh ko amīr-e-shahr ne dī hai sazā
maiñ ne ḳhud ko ḳhādim-e-sibt-e-payambar kah diyā

chaḌhte sūraj kī parastish meñ sabhī masrūf the
mujh se jab pūchhā gayā allāhu-akbar kah diyā

kitne sāda-lauh haiñ ye sab safīran-e-junūñ
rāhzan bhī mil gayā to us ko rahbar kah diyā

ho gayā dushman bhī mere hausle kā mo'tarif
mujh ko dariyā-e-havādis kā shanāvar kah diyā

sher kahne meñ mujhe 'ājiz' maza aane lagā
us ne jab be-sāḳhta mujh ko suḳhan-var kah diyā

dushmanon ko dost bhai ko sitamgar kah diya
log kyun barham hain kya shishe ko patthar kah diya

is liye mujh ko amir-e-shahr ne di hai saza
main ne KHud ko KHadim-e-sibt-e-payambar kah diya

chaDhte suraj ki parastish mein sabhi masruf the
mujh se jab puchha gaya allahu-akbar kah diya

kitne sada-lauh hain ye sab safiran-e-junun
rahzan bhi mil gaya to us ko rahbar kah diya

ho gaya dushman bhi mere hausle ka mo'tarif
mujh ko dariya-e-hawadis ka shanawar kah diya

sher kahne mein mujhe 'ajiz' maza aane laga
us ne jab be-saKHta mujh ko suKHan-war kah diya