kahīñ na aisā ho apnā vaqār khā jaa.e
ḳhizāñ se phuul bachā.eñ bahār khā jaa.e

hamāre jaisā kahāñ dil kisī kā hogā bhalā
jo dard paale rakhe aur qarār khā jaa.e

palaT ke sañg tirī aur pheñk saktā huuñ
ki maiñ vo qais nahīñ haañ jo maar khā jaa.e

usī kā dāḳhila is dasht meñ karo ab se
jo sabr pī sake apnā ġhubār khā jaa.e

bahut qarār hai thoḌī sī be-qarārī de
kahīñ na aisā ho mujh ko qarār khā jaa.e

ajab safīna hai ye vaqt kā safīna bhī
jo apnī god meñ baiThā savār khā jaa.e

kahin na aisa ho apna waqar kha jae
KHizan se phul bachaen bahaar kha jae

hamare jaisa kahan dil kisi ka hoga bhala
jo dard pale rakhe aur qarar kha jae

palaT ke sang teri aur phenk sakta hun
ki main wo qais nahin han jo mar kha jae

usi ka daKHila is dasht mein karo ab se
jo sabr pi sake apna ghubar kha jae

bahut qarar hai thoDi si be-qarari de
kahin na aisa ho mujh ko qarar kha jae

ajab safina hai ye waqt ka safina bhi
jo apni god mein baiTha sawar kha jae