vo misl-e-ā.īna dīvār par rakkhā huā thā
jo ik in.aam merī haar par rakkhā huā thā

maiñ baa.eñ haath se dushman ke hamle roktā thā
ki dāyāñ haath to dastār par rakkhā huā thā

vahī to ek sahrā-āshnā thā qāfile meñ
vo jis ne aable ko ḳhaar par rakkhā huā thā

visāl o hijr ke phal dūsroñ ko us ne baḳhshe
mujhe to rone kī begār par rakkhā huā thā

musallam thī saḳhāvat jis kī duniyā bhar meñ us ne
mujhe tanḳhvāh-e-be-dīnār par rakkhā huā thā

ḳhat-e-taqdīr ke saffāk o afsurda sire par
mirā aañsū bhī dast-e-yār par rakkhā huā thā

falak ne us ko paalā thā baḌe nāz-o-ni.am se
sitāra jo tire ruḳhsār par rakkhā huā thā

vahī to zinda bach ke aa.e haiñ terī galī se
jinhoñ ne sar tirī talvār par rakkhā huā thā

vo sub.h o shaam miTTī ke qasīde bhī sunātā
aur us ne haath bhī ġhaddār par rakkhā huā thā

tire raste meñ merī donoñ āñkheñ thiiñ farozāñ
diyā to bas tire isrār par rakkhā huā thā

wo misl-e-aina diwar par rakkha hua tha
jo ek inam meri haar par rakkha hua tha

main baen hath se dushman ke hamle rokta tha
ki dayan hath to dastar par rakkha hua tha

wahi to ek sahra-ashna tha qafile mein
wo jis ne aable ko KHar par rakkha hua tha

visal o hijr ke phal dusron ko us ne baKHshe
mujhe to rone ki begar par rakkha hua tha

musallam thi saKHawat jis ki duniya bhar mein us ne
mujhe tanKHwah-e-be-dinar par rakkha hua tha

KHat-e-taqdir ke saffak o afsurda sire par
mera aansu bhi dast-e-yar par rakkha hua tha

falak ne us ko pala tha baDe naz-o-niam se
sitara jo tere ruKHsar par rakkha hua tha

wahi to zinda bach ke aae hain teri gali se
jinhon ne sar teri talwar par rakkha hua tha

wo subh o sham miTTi ke qaside bhi sunata
aur us ne hath bhi ghaddar par rakkha hua tha

tere raste mein meri donon aankhen thin farozan
diya to bas tere israr par rakkha hua tha