Subscribe to our newsletter and get our newest updates

Fani Badayuni

  • Ghazal


ada se aaD mein KHanjar ke munh chhupae hue


adā se aaḌ meñ ḳhanjar ke muñh chhupā.e hue
mirī qazā ko vo laa.e dulhan banā.e hue

ilāhī kyuuñ nahīñ hotī koī balā nāzil
asar hai der se dast-e-duā uThā.e hue

tirī lagā.ī huī aag hashr tak na bujhī
hue na mar ke bhī ThanDe tire jalā.e hue

balā-e-jāñ hai magar phir bhī aarzū hai tirī
ham us ko apne kaleje se haiñ lagā.e hue

sahar huī ki vo yādash-ba-ḳhair aatā hai
charāġh haiñ mirī turbat ke jhilmilā.e hue

tumhīñ kaho ki tumheñ apnā samajh ke kyā paayā
magar yahī ki jo apne the sab parā.e hue

kisī kā haa.e vo maqtal meñ is tarah aanā
nazar bachā.e hue āstīñ chaḌhā.e hue

ajal ko muzhda-e-fursat ki aaj 'fānī'-e-zār
umīd-e-vasl se baiThā hai lau lagā.e hue

ada se aaD mein KHanjar ke munh chhupae hue
meri qaza ko wo lae dulhan banae hue

ilahi kyun nahin hoti koi bala nazil
asar hai der se dast-e-dua uThae hue

teri lagai hui aag hashr tak na bujhi
hue na mar ke bhi ThanDe tere jalae hue

bala-e-jaan hai magar phir bhi aarzu hai teri
hum us ko apne kaleje se hain lagae hue

sahar hui ki wo yaadash-ba-KHair aata hai
charagh hain meri turbat ke jhilmilae hue

tumhin kaho ki tumhein apna samajh ke kya paya
magar yahi ki jo apne the sab parae hue

kisi ka hae wo maqtal mein is tarah aana
nazar bachae hue aastin chaDhae hue

ajal ko muzhda-e-fursat ki aaj 'fani'-e-zar
umid-e-wasl se baiTha hai lau lagae hue


Leave a comment

+